రామన్నకు పార్టీ పట్టం

-నవశకానికి యువనాయకత్వం
-టీఆర్‌ఎస్ వర్కింగ్ ప్రెసిడెంట్‌గా కేటీఆర్ నియామకం
-రాష్ట్రంలో అభివృద్ధి కార్యక్రమాల నిర్వహణతోపాటు
-దేశరాజకీయాలపై దృష్టిపెట్టిన ముఖ్యమంత్రి కేసీఆర్
-వ్యక్తిగతంగా పనిభారం పెరుగుతున్న నేపథ్యంలోపార్టీ నిర్మాణ బాధ్యతలు కేటీఆర్‌కు అప్పగింత
-వివిధ ఎన్నికల్లో సామర్థ్యం చాటిన కేటీఆర్
-యువనేతకు పార్టీ సీనియర్ల ఆశీర్వాదం
-పార్టీ శ్రేణుల్లో వెల్లువెత్తిన హర్షాతిరేకాలు
-17న తెలంగాణ భవన్‌లో బాధ్యతల స్వీకరణ

హైదరాబాద్, నమస్తే తెలంగాణ: తెలంగాణ రాష్ట్ర సమితి చరిత్రలో కొత్త అధ్యాయం మొదలైంది. రెండోసారి అధికారంలోకి వచ్చి నవశకాన్ని ప్రారంభించబోతున్న పార్టీకి యువ నాయకత్వం కీలక బాధ్యతల్లోకి వచ్చింది. మాజీ మంత్రి, సిరిసిల్ల ఎమ్మెల్యే కల్వకుంట్ల తారకరామారావును టీఆర్‌ఎస్ కార్యనిర్వాహక అధ్యక్షుడిగా పార్టీ అధినేత కే చంద్రశేఖర్‌రావు శుక్రవారం నియమించారు. వర్కింగ్ ప్రెసిడెంట్‌గా ఈ నెల 17న కేటీఆర్ బాధ్యతలు చేపట్టనున్నారు. రాష్ట్ర ప్రజలు టీఆర్‌ఎస్‌పై విశ్వాసంతో రెండోవిడుత అధికారం అప్పగించిన నేపథ్యంలో ప్రభుత్వపరంగా అత్యంత కీలకమైన నీటిపారుదల ప్రాజెక్టులను పూర్తిచేయాల్సిన కర్తవ్యాలు, ఎన్నికల్లో ప్రజలకు ఇచ్చిన వాగ్దానాలను అమలుచేయాల్సిన బాధ్యతలు కేసీఆర్‌పై ఉన్నాయి. మరోవైపు దేశ రాజకీయాల్లో గుణాత్మక మార్పు తీసుకురావడానికి జాతీయ రాజకీయాలపై దృష్టిపెట్టాలని కేసీఆర్ నిర్ణయించుకున్నారు. దీనివల్ల తరచూ ఢిల్లీ సహా వివిధ ప్రాంతాలకు వెళ్లాల్సి ఉంటుంది. వీటన్నింటితో పనిభారం పెరుగుతున్నందున అత్యంత నమ్మకస్తుడు, సమర్థుడికి పార్టీ బాధ్యతలు అప్పగించాలని భావించిన కేసీఆర్ ఈ నిర్ణయం తీసుకున్నారు. తాను నిర్వహించే శాఖల విషయంలోనేకాకుండా.. పార్టీపరంగా కూడా కేటీఆర్ అనేక సందర్భాల్లో తన సత్తా చాటుకున్నారు. జీహెచ్‌ఎంసీ ఎన్నికలు, వివిధ ఉప ఎన్నికలతోపాటు.. తాజాగా ముగిసిన అసెంబ్లీ ఎన్నికల్లో విస్తృతంగా ప్రచారం చేసి.. పార్టీ గెలుపులో కీలక పాత్ర పోషించారు. ఆయా సందర్భాల్లో పార్టీశ్రేణులతో కలగలిసిపోయి వారిలో ఒకడిగా మెదిలారు. కేటీఆర్‌ను వర్కింగ్ ప్రెసిడెంట్‌గా నియమించినట్టు తెలియగానే టీఆర్‌ఎస్ శ్రేణులు హర్షాతిరేకాలు వ్యక్తంచేశారు. తన నియామక ప్రకటన వెలువడిన తర్వాత టీఆర్‌ఎస్ సెక్రటరీ జనరల్, పార్లమెంటరీ పార్టీ నాయకుడు కే కేశవరావు, తన సహచర మాజీ మంత్రి తన్నీరు హరీశ్‌రావును కేటీఆర్ వారి నివాసాలకు వెళ్లి మర్యాదపూర్వకంగా కలిశారు. పలువురు సీనియర్లు కేటీఆర్ నాయకత్వంపై పూర్తి విశ్వాసాన్ని వ్యక్తంచేశారు. తమ ఆశీర్వాదాలు ఉంటాయని ప్రకటించారు.

పార్టీ పటిష్టతను కోరుతున్న ప్రజలు

తెలంగాణ ఉద్యమానికి రాజకీయ వేదికను ఏర్పాటుచేయాలనే లక్ష్యంతో తెలంగాణ రాష్ట్ర సమితిని కేసీఆర్ స్థాపించారు. టీఆర్‌ఎస్.. తెలంగాణ ఉద్యమాన్ని గమ్యానికి చేర్చి, ప్రత్యేక రాష్ట్రాన్ని సాధించింది. రాష్ట్రంలో తొలి ప్రభుత్వం ఏర్పాటు చేసిన టీఆర్‌ఎస్.. బంగారు తెలంగాణ నిర్మాణం దిశగా బలమైన అడుగులు వేసింది. రాష్ట్రానికి టీఆర్‌ఎస్ మాత్రమే శ్రీరామరక్ష అని ప్రజలు ఏకోన్ముఖంగా భావించి, ఇటీవల ఎన్నికల్లో తిరుగలేని విజయం అందించారు. రాష్ట్ర ప్రజలకు టీఆర్‌ఎస్‌పై అచంచల విశ్వాసం ఉంది. తెలంగాణ భవిష్యత్తు బంగారుమయం కావాలంటే టీఆర్‌ఎస్ అత్యంత పటిష్టంగా ఉండాలని ప్రజలు కోరుకుంటున్నారు.

విశ్వసనీయుడికి కీలక బాధ్యత

జాతీయ రాజకీయాల్లో క్రియాశీల పాత్ర పోషించడం, రాష్ట్రంలో అభివృద్ధి కార్యక్రమాలను ముందుకు తీసుకపోవాల్సి ఉండడంతో కేసీఆర్‌పై పనిభారం పెరుగుతున్నది. ఈ నేపథ్యంలో టీఆర్‌ఎస్‌ను తాను అనుకున్న విధంగా ముందుకు తీసుకెళ్లే బాధ్యతను, పార్టీలో తాను అత్యంత ఎక్కువగా విశ్వసించే కేటీఆర్‌కు ఆయన అప్ప గించారు. పార్టీ సభ్యత్వ నమోదు కార్యక్రమం నిర్వహించడం, జిల్లాల్లో పార్టీ కార్యాలయాలు నిర్మించడం, సంస్థాగతంగా తిరుగులేనిశక్తిగా టీఆర్‌ఎస్‌ను తీర్చిదిద్దే బాధ్యతలను కేటీఆర్‌కు అప్ప గించారు. దేశంలోనే అతి గొప్ప పార్టీగా టీఆర్‌ఎస్‌ను రూపుదిద్దాలనే సంకల్పంతో కేసీఆర్ ఉన్నారు. ఇప్పటివరకు అటు ప్రభుత్వంలో, ఇటు పార్టీలో ఇచ్చిన బాధ్యతలన్నీ అత్యంత విజయవంతంగా నిర్వహించిన కేటీఆర్‌కు పార్టీ బాధ్యతలు అప్పగించాలని కేసీఆర్ నిర్ణయించారు. కేటీఆర్ పనితీరు, నిబద్ధత, దార్శనికత, నాయకత్వ లక్షణాలు టీఆర్‌ఎస్ పార్టీని సుస్థిరంగా, సుభిక్షంగా నిలుపుతాయని కేసీఆర్ విశ్వసిస్తున్నారు.

17న బాధ్యతలు స్వీకరించనున్న కేటీఆర్

టీఆర్‌ఎస్ వర్కింగ్ ప్రెసిడెంట్‌గా నియమితులైన కేటీఆర్.. ఈ నెల 17న తెలంగాణభవన్‌లో బాధ్యతలు స్వీకరించనున్నారు. ఆయనకోసం భవన్‌లో ప్రత్యేక చాంబర్‌ను సిద్ధంచేశారు. హైదరాబాద్‌లో అందుబాటులో ఉన్న రోజుల్లో పార్టీ కార్యాలయానికి వచ్చి.. నాయకులకు, కార్యకర్తలకు అందుబాటులో ఉంటారు. నెలలో కనీసం 15, 20 రోజలు పార్టీ కార్యకర్తలకు అందుబాటులో ఉండాలని కార్యవర్గ సమావేశంలో కేసీఆర్ చేసిన సూచన మేరకు కార్యాచరణ రూపొందించుకోవాలని కేటీఆర్ నిర్ణయించారు.